ஆயர் ராஜா விரைவுச்சாலையில் இரட்டிப்பாகவுள்ள மின்னியல் சாலைக் கட்டணம்

மின்னியல் சாலைக் கட்டணங்களில் நிலப் போக்குவரத்து ஆணையம் மாற்றங்களைச் செய்துள்ளது.

ஆக அண்மையக் காலாண்டின் போக்குவரத்து மதிப்பீட்டின் அடிப்படையில் அவை அமைந்துள்ளதாய் ஆணையம் சொன்னது. 

நார்த் போனா விஸ்ட்டா ரோட்டிற்குப் பிறகு துவாஸை நோக்கிச் செல்லும் ஆயர் ராஜா விரைவுச்சாலையில், மாலை 6 மணி முதல் ஆறரை மணி வரையிலான கட்டணம் இரு மடங்காகவுள்ளது. 

தற்போது ஒரு வெள்ளியாக இருக்கும் அந்தக் கட்டணம் இனி இரண்டு வெள்ளிக்கு உயரவுள்ளது. 

அடுத்த மாதம் 8ஆம் தேதி அது நடப்புக்கு வரும்.

அதே நாளன்று, காலாங் - பயா லேபார் விரைவுச்சாலையில் டேஃபூ மேம்பாலத்துக்குப் பிறகு, புதிய மின்னியல் சாலைக் கட்டண நுழைவாயில் அமைக்கப்படவுள்ளது. 

காலை 7 மணி முதல், 9.30மணி வரை, அந்தப் பகுதியைக் கடப்போர் 2 வெள்ளிக் கட்டணத்தைச் செலுத்த நேரிடும்.

போக்குவரத்து நெரிசலைச் சமாளிக்க அந்த நடவடிக்கை எடுக்கப்படுவதாய் ஆணையம் கூறியது.

அடுத்தபடியாக, ஜூன் பள்ளி விடுமுறைக் காலத்திற்கான மின்னியல் சாலைக் கட்டணங்கள் அடுத்த மாதம் பரிசீலிக்கப்படும்.