உங்கள் மனத்தைக் கடைசியாக எப்போது சுத்தம் செய்தீர்கள் ?
வீட்டைச் சுத்தம் செய்வது பற்றி எல்லாருக்குமே தெரியும்.
இது என்ன? புதிதாக இருக்கிறதே என்று யோசிக்கிறீர்களா ? வீட்டைப் போல் மனத்தையும் அடிக்கடி சுத்தம் செய்வது அவசியம் என்பது என் நம்பிக்கை.
வீட்டை அடிக்கடி சுத்தம் செய்யாமற்போனால் எப்படித் தூசு சேருமோ அதேபோல் மனத்தைச் சுத்தம் செய்யாமற்போனால் தேவையற்ற எண்ணங்கள் அதில் படிந்து கொஞ்சம் கொஞ்சமாக நம்மைப் பாதிக்கத் தொடங்கலாம்.
சன்னல்களை மூடி வைத்தாலும், கனமான திரையிட்டாலும்கூட, எப்படியோ வீட்டுக்குள் தூசு படியத்தான் செய்கிறது.
சன்னல்கள் எல்லாமே மூடப்பட்ட குளிரூட்டப்பட்ட அறைகளிலும்கூட நாளடைவில் தூசு படியத்தான் செய்கிறது.
அதுபோல் எவ்வளவு நல்ல எண்ணங்களைக் கொண்டிருந்தாலும் நமது மனத்திலும் தேவையற்ற எண்ணங்களும் சிந்தனைகளும் படியத்தான் செய்கின்றன.
நல்ல எண்ணங்கள், நம் நல்லொழுக்கத்துக்கு வித்தாகும். அதுபோல, தீய எண்ணங்களுக்குத் தீய விளைவுகளை ஏற்படுத்தும் ஆற்றல் உண்டு.
அதனால்தான் அவ்வப்போது வீட்டைத் தூய்மை செய்வதுபோல மனத்தையும் ஒட்டடை அடிக்கவேண்டும்.
இதை மாதம் ஒருமுறையாவது செய்யலாம்.
விருப்பு வெறுப்பில்லாமல், நம்மை நாமே விமர்சனத்துக்கு உட்படுத்தி, நம் எண்ணங்களை உற்றுப் பார்க்கலாம்.
பொறாமை, துரோகம், வஞ்சம், அச்சம், கவலை, பழிவாங்கும் மனப்பான்மை போன்ற தீய எண்ணங்கள் நமக்குள் இருக்கின்றனவா என
நம்மை நாமே நேர்மையாகப் பரிசீலிக்கலாம்.
அப்படி இருப்பதாக உணர்ந்தால், அதைக் களைவதற்கு உண்மையான முயற்சிகளை எடுக்கலாம்.
பிரச்சினை இல்லாத மனிதர்கள் எவரும் உலகில் இல்லை. எல்லாருக்குமே ஏதோ ஒரு பிரச்சினை இருக்கத்தான் செய்கிறது.
அதை நாம் எப்படிக் கையாளுகிறோம் என்பதில்தான் எல்லாமே இருக்கிறது.
எதிலுமே நமது கண்ணோட்டம்தான் நமது நிம்மதியைத் தீர்மானிக்கிறது.
பிரச்சினைகளைப் பற்றியும் பிரச்சினைக்குக் காரணமானவர்களைப் பற்றியும் நமது உள்மனது எப்போதுமே சிந்தித்து
அதிலிருந்து விடுபடும் சாத்தியங்களை ஆராய்ந்துகொண்டே இருக்கும். அது மனித இயல்பு.
ஆனால், பிரச்சினையிலிந்து விடுபடுவதற்கான முயற்சியில் நம் அன்புக்குரியவர்களையோ சக மனிதர்களையோ நாம் காயப்படுத்திவிடாமலிருப்பது அவசியம்.
அன்புடன்
பொன். மகாலிங்கம்
