போட்டிகளின் 6ம் நாள்

இன்று காலை நடைபெற்ற குறிசுடும் போட்டியில், சிங்கப்பூர் தங்கப் பதக்கத்தை வென்றுள்ளது. ஆண்கள், ஐம்பது மீட்டர் கைத்துப்பாக்கிச் சுடும் இறுதிப் போட்டியில், Gai Bin, Poh Lip Meng, Lim Swee Hon-ஆகிய மூவர் அடங்கிய குழு, மொத்தம் ஆயிரத்து-632 புள்ளிகளைப் பெற்று வெற்றிகண்டது. அதோடு, மூன்று பேரும், ஒற்றையருக்கான இறுதிப் போட்டிக்கும் தகுதிபெற்றுள்ளனர்.

இதற்கிடையே, பெண்கள் 25 மீட்டர் கைத்துப்பாக்கிச் சுடும் இறுதிப் போட்டியில்,  Teo Shun Xie, Nicole Tan, Teh Xiu Hong Tan-ஆகிய மூவர் அடங்கிய சிங்கப்பூர்க் குழு, வெள்ளிப் பதக்கத்தைப் பெற்றுள்ளது. அவர்கள் மூவரும், ஒற்றையருக்கான போட்டிக்கும் தகுதிபெற்றுள்ளனர். இந்நிலையில், சிங்கப்பூரின் 23-வயதுக்கு உட்பட்ட Young Lions காற்பந்துக் குழுவினர், அரை இறுதிச் சுற்றுக்குத் தகுதிபெற, இன்றிரவு Jalan Besar விளையாட்டரங்கில் நடைபெறவிருக்கும் ஆட்டத்தில், இந்தோனேசியாவைத் தோற்கடிக்கவேண்டும். A-பிரிவில், அந்த இரண்டு குழுக்களுமே ஆறு புள்ளிகளைப் பெற்றுள்ளன. இருப்பினும், கோல் எண்ணிக்கை வித்தியாசத்தில், Young Lions குழு பின்தங்கியிருக்கிறது. அப்படி என்றால், அரை இறுதிச் சுற்றுக்கு சிங்கப்பூர் தகுதிபெற, இன்றைய ஆட்டத்தில் சமநிலை காண்பது மட்டும் போதாது.