அமெரிக்கத் துணையதிபராகப் போட்டியிடும் கமலா ஹேரிஸ்...யார் இவர்?
அமெரிக்காவில், வரும் நவம்பர் மாதம் நடைபெறவுள்ள அதிபர் தேர்தலில் ஜனநாயகக் கட்சியின் சார்பில் போட்டியிடும் ஜோ பைடன், துணை அதிபராகத் திருவாட்டி கமலா ஹேரிஸைத் தேர்ந்தெடுத்திருக்கிறார்.
வாசிப்புநேரம் -
அமெரிக்காவில், வரும் நவம்பர் மாதம் நடைபெறவுள்ள அதிபர் தேர்தலில் ஜனநாயகக் கட்சியின் சார்பில் போட்டியிடும் ஜோ பைடன், துணை அதிபராகத் திருவாட்டி கமலா ஹேரிஸைத் தேர்ந்தெடுத்திருக்கிறார்.
யார் இந்த கமலா ஹேரிஸ்? இவரது பின்புலம் என்ன?
- கலிஃபோர்னியா செனட்டரான திருவாட்டி ஹேரிஸ், இரண்டு வெவ்வேறு இனங்களைச் சேர்ந்த பெற்றோருக்குப் பிறந்தவர்.
- தாயார் இந்தியாவைச் சேர்ந்தவர்; தந்தை ஜமைக்காவைச் சேர்ந்தவர்.
- பெற்றோரின் விவாகரத்திற்குப் பின், இந்து சமயத்தைச் சேர்ந்த அவரது தாயாரான திருவாட்டி ஷாமளா கோபாலன், தமது இரண்டு மகள்களையும் வளர்த்தார்.
- திருவாட்டி கமலா ஹேரிஸுக்கு மாயா என்ற தங்கை இருக்கிறார்.
- திருவாட்டி மாயாவும் ஒரு வழக்குரைஞர், அரசியல் ஆய்வாளர்.
- புற்றுநோய் ஆய்வாளரான திருவாட்டி ஹேரிஸின் தாயார், இந்தியப் பாரம்பரியங்களைக் கற்றுக்கொடுத்துத் தமது இரு மகள்களையும் வளர்த்ததாக BBC செய்தி நிறுவனத்தின் அறிக்கை குறிப்பிட்டது.
- மக்கள் உரிமை ஆர்வலரான திருவாட்டி ஹேரிஸின் தாயார், ஆக்லந்தில் கறுப்பினக் கலாசாரத்துடன் இணங்க, தங்களை வளர்த்து ஆளாக்கியதாகத் திருவாட்டி ஹேரிஸ் கூறியிருக்கிறார்.
- திருவாட்டி ஹேரிஸ் தமது தாயார், தங்கையோடு கனடாவில் 5 ஆண்டுகள் வசித்த அனுபவமுள்ளவர்.
- சமுதாயம் தங்களைக் கறுப்பினத்தவராகவே கருதும் என்று அறிந்த தமது தாயார், துணிவும், நம்பிக்கையும், பெருமையும் மிகுந்த பெண்களாகத் தங்களைப் பார்க்க விரும்பியதாகத் திருவாட்டி ஹேரிஸ் குறிப்பிடுகிறார்.
- கலிஃபோர்னியப் பல்கலைக்கழகத்தில் சட்டக்கல்வி பயின்ற திருவாட்டி ஹேரிஸ், 2003ஆம் ஆண்டு சான் பிரான்சிஸ்கோவின் மாவட்ட வழக்குரைஞரானார்.
- அதன்பின், கலிஃபோர்னியாவின் முதல் பெண், கறுப்பினத் தலைமைச் சட்ட அதிகாரியாகப் பொறுப்பேற்றார்.
- இரு தவணைக் காலம் அந்தப் பொறுப்பில் இருந்தபோது அவரது அரசியல் செல்வாக்கு அதிகரித்தது.
- ஜனநாயகக் கட்சியின் வளர்ந்துவரும் அரசியல் தலைவராக அவர் கருதப்பட்டார்.
- பல்வேறு மனித உரிமைப் பிரச்சினைகளைத் திறம்படக் கையாண்டு புகழ்பெற்றார்.
- 2014 ஆம் ஆண்டு திருவாட்டி ஹேரிஸ், டக்லஸ் எம்ஹோஃப் (Douglas Emhoff) என்னும் வழக்குரைஞரை மணந்தார்.
- கலிஃபோர்னியா மாநில செனட்டராகப் பொறுப்பேற்ற பிறகு திருவாட்டி ஹேரிஸ், பல முக்கிய விவகாரங்களில் செனட் சபையில் கேள்வி எழுப்பினார்.
- சென்ற ஆண்டுத் தொடக்கத்தில் ஜனநாயகக் கட்சியின் அதிபர் வேட்பாளராகத் தம்மை முன்னிறுத்தினார் திருவாட்டி ஹேரிஸ். ஆக்லந்தில் 20,000 பேர் முன்னிலையில் அவர் அதனை அறிவித்தார்.
- இருப்பினும், தமது பிரசார வாதங்களை அவர் தெளிவாக முன்வைக்கவில்லை என்று குறைகூறப்பட்டது. மேலும் சுகாதாரப் பராமரிப்புக் கொள்கைகளுக்கு அவர் அளித்த விளக்கம் திருப்தியளிக்கும் விதமாக இல்லை என்ற கருத்தும் நிலவியது.
- சென்ற ஆண்டு இறுதியில் அதிபர் போட்டியிலிருந்து விலகுவதாகத் திருவாட்டி ஹேரிஸ் அறிவித்தார்.
- இந்த ஆண்டு மார்ச் மாதம், முன்னாள் துணையதிபர் ஜோ பைடன் ஜனநாயகக் கட்சி சார்பில் போட்டியிடுவது உறுதியானதும், திருவாட்டி ஹேரிஸ் அவருக்குத் தமது முழு ஆதரவைத் தெரிவிப்பதாக அறிவித்தார்.