குழுத்தொகுதிகள் - முக்கிய மாற்றங்கள்

சிங்கப்பூரில் எதிர்வரும் பொதுத்தேர்தலில் மொத்தம் 18 குழுத்தொகுதிகள் இடம்பெறும்.

முந்தைய தேர்தலில் மொத்தம் 17 குழுத்தொகுதிகள் இருந்தன.

📍 பாசிர் ரிஸ்-சாங்கி, பொங்கோல் குழுத்தொகுதிகள்

அவை தற்போது 5 நாடாளுமன்ற உறுப்பினர்களைக் கொண்ட
பாசிர் ரிஸ் -பொங்கோல் குழுத்தொகுதியிலிருந்து அமைக்கப்பட்டுள்ளன.

பொங்கோலில் சில வட்டாரங்களும் பொங்கோல் வெஸ்ட் தனித்தொகுதியும் சேர்ந்து புதிய பொங்கோல் குழுத்தொகுதியாக மாறும்.

பாசிர் ரிஸ் -பொங்கோல் குழுத்தொகுதியின் எஞ்சிய வட்டாரங்களும் ஈஸ்ட் கோஸ்ட் குழுத்தொகுதியிலிருந்து சில வட்டாரங்களும் சேர்ந்து புதிய பாசிர் ரிஸ்-சாங்கி குழுத்தொகுதியாக உருமாறும்.

2020ஆம் ஆண்டின் பொதுத்தேர்தலுக்குப் பிறகு, பாசிர் ரிஸ் -பொங்கோல் குழுத்தொகுதியில் வசிக்கும் வாக்காளர் எண்ணிக்கை ஆக அதிகமாக அதிகரித்துள்ளது.

அங்கு புதிய வீடுகள் கட்டப்படும் நிலையில் மேலும் அதிகமானோர் குடியேறுவர் என்று எதிர்பார்க்கப்படுகிறது.

இந்நிலையில் தொகுதி எல்லைகளில் மாற்றம் செய்யப்படுவதாகத் தொகுதி எல்லைகள் மறுஆய்வுக் குழு சொன்னது.

📍 வெஸ்ட் கோஸ்ட் - ஜூரோங் வெஸ்ட் குழுத்தொகுதி

தற்போதைய வெஸ்ட் கோஸ்ட் குழுத்தொகுதியின் சில பகுதிகளையும், ஜூரோங் வெஸ்ட், தாமான் ஜூரோங் வட்டாரத்தின் சில பகுதிகளையும் சேர்த்து புதிதாக உருவாக்கப்பட்டுள்ளது.

சென்ற தேர்தலில் வெஸ்ட் கோஸ்ட் தொகுதியில் கடும் போட்டி நிலவியது.

📍 ஜூரோங் ஈஸ்ட் - புக்கிட் பாத்தோக் குழுத்தொகுதி

தற்போதைய புக்கிட் பாத்தோக் தனித்தொகுதி, யூஹுவா தனித்தொகுதி, ஹோங் கா நார்த் தனித்தொகுதி ஆகியவற்றின் சில பகுதிகளையும் ஜூரோங் குழுத்தொகுதியின் சில வட்டாரங்களையும் இணைத்து புதிதாக ஜூரோங் ஈஸ்ட் - புக்கிட் பாத்தோக் குழுத்தொகுதி அமைக்கப்பட்டுள்ளது.

📍 மரீன் பரேட் - பிராடல் ஹைட்ஸ் குழுத்தொகுதி

தற்போதைய மரீன் பரேட் குழுத்தொகுதியின் சில பகுதிகளும், பொத்தோங் பாசிர், மௌன்ட்பேட்டன் ஆகிய தனித்தொகுதிகளின் சில வட்டாரங்களும், மெக்பர்சன் தனித்தொகுதியும் சேர்ந்து புதிதாக மரீன் பரேட் - பிராடல் ஹைட்ஸ் குழுத்தொகுதியாக அமைக்கப்பட்டுள்ளது.

📍 வெஸ்ட் கோஸ்ட் குழுத்தொகுதியில் மாற்றங்கள்

• வெஸ்ட் கோஸ்ட் குழுத்தொகுதியில் இருந்த ஹார்பர்பிரண்ட் (Harbourfront), செந்தோசா (Sentosa) பகுதிகள் ராடின் மாஸ் தனித்தொகுதிக்கு மாறிவிடும்.
• வெஸ்ட் கோஸ்ட் குழுத்தொகுதியிலிருந்து டோவர், தெலோக் பிளாங்கா பேட்டைகள் நீக்கப்படும், அவை தஞ்சோங் பகார் குழுத்தொகுதியில் இணைக்கப்படும்.

📍 மற்ற சில மாற்றங்கள்

• ஈஸ்ட் கோஸ்ட் குழுத்தொகுதியுடன் தற்போதைய மரீன் பரேட் குழுத்தொகுதியின் சில பகுதிகள் சேர்ந்துவிடும்.
• தஞ்சோங் பகார் குழுத்தொகுதியுடன் டோவர், தெலோக் பிளாங்கா வட்டாரங்கள் சேர்ந்துவிடும்.
• சுவா சு காங் குழுத்தொகுதியுடன் தெங்கா வட்டாரங்கள் சேர்ந்துவிடும்.