வீடுகளில் அடிக்கடி தீ... தவிர்ப்பது எப்படி?

சிங்கப்பூரில் பெரும்பகுதி மக்கள் வீடமைப்பு வளர்ச்சிக் கழக வீடுகளில் வசிக்கிறார்கள்.

அவ்வப்போது கழக புளோக்குகளில் ஏற்படும் தீச்சம்பவங்கள் குறித்துச் செய்தி வருகிறது.

தீச்சம்பவங்களைத் தவிர்க்க முடியுமா? எப்படி?
HDB mynicehome இணையத்தளம் பட்டியல் தருகிறது.

தனிநபர் நடமாட்டச் சாதனம் (PMD)

🔥 தனிநபர் நடமாட்டச் சாதனத்தை வைத்திருந்தால் அவற்றின் மின்கலன்களை இரவு முழுவதும் மின்னூட்டம் செய்வதைத் தவிர்க்கவும்.

🔥 சாதனம் மின்னூட்டம் செய்யப்படும்போது அதைக் கண்காணிக்கவேண்டும்.

🔥 மின்னூட்டம் செய்யப்படும் மின்கலனை எளிதில் தீப்பிடிக்கக்கூடிய பொருள்களுக்கு (காகிதம், துணி) அருகில் வைப்பதைத் தவிர்க்கவும்.

🔥 நிலப் போக்குவரத்து ஆணையம் அங்கீகரித்த, ஆணையத்திடம் பதிவுசெய்யப்பட்ட தனிநபர் நடமாட்டச் சாதனங்களை மட்டும் வாங்கவேண்டும். ஏற்கனவே பயன்படுத்தப்பட்ட சாதனங்களை வாங்கும்போதும் அவை பதிவு செய்யப்பட்டவைதானா என்பதை உறுதிசெய்ய வேண்டும்.

சமையலறை அடுப்புகள்

🔥 சமைக்கும்போது சட்டி, பானைகள் வெகு விரைவில் தீப்பிடிக்கக்கூடிய அபாயம் இருக்கிறது. அதனால் சமைக்கும்போது சமையலறையை விட்டுச் செல்வதைத் தவிர்க்கவும்.

🔥 எண்ணெய் போன்ற எளிதில் தீப்பிடிக்கக்கூடிய திரவங்களை அடுப்பிலிருந்து தள்ளி வைத்தால் தீ ஏற்படுவதைத் தவிர்க்கலாம்.

மின்சார இணைப்புக் கட்டமைப்பு

🔥 மின்சார இணைப்புக் கட்டமைப்பில் அதிக அளவில் மின்-சாதனங்கள் இணைக்கப்படும்போது தீ ஏற்படலாம்.

🔥 அதனால் இருக்கும் இணைப்புகளை மட்டும் பயன்படுத்துவது நல்லது.

🔥 சாதனங்களைப் பயன்படுத்தாதபோது மின்சாரத்தைத் துண்டிப்பது முக்கியம்.

ஊதுபத்தி, மெழுகுவர்த்திகள்

🔥 ஊதுபத்தி, மெழுகுவர்த்திகளைத் திரைச்சீலை அல்லது எளிதில் தீப்பிடிக்கக்கூடிய பொருள்களுக்கு அருகில் வைப்பதைத் தவிர்க்கவும். மரச்சட்டத்தில்கூடத் தீ பரவக்கூடும்.

சிகரெட் துண்டுகள்

🔥 பற்றவைக்கப்பட்ட சிகரெட் துண்டுகளைக் குப்பையில் வீசுவதைத் தவிர்க்கவும். புகை இல்லாமல் இருந்தாலும் உள்ளே சிறு நெருப்பு இருக்கலாம்.