சிங்கப்பூரில் அண்டை வீட்டாரிடையே பிரச்சினை இருந்தால் பலர் அதைப் பற்றிப் பேசித் தீர்க்கத் தயங்குகின்றனர்.

சமரசப் பேச்சு நடத்தப்படும் Community mediation centre அதாவது சமூக சமரச நிலையத்துக்கு வரும் புகார்களில் 30 விழுக்காடு மட்டுமே பேச்சுவார்த்தைக்கு வருகிறது.

இதற்குக் காரணம்?

அண்டைவீட்டாரில் ஒருவருக்கு பேச்சுவார்த்தையில் விருப்பம் இல்லை அல்லது இருவருக்கும் விருப்பம் இல்லை என்றால்
சமாதானப் பேச்சு இடம்பெறாது.

பேச்சுவாரத்தை நடத்துவதற்கான அழைப்பைப் பெரும்பாலோர் மறுத்துவிடுகின்றனர்.

"எப்படி நாங்கள் சொல்லிப் பார்த்தாலும் சிலர் வரமாட்டார்கள். சட்டப்படி வேறு எதையும் செய்யவும்முடியாது," என்றார் சமூக சமரச நிலையத்தின் சமரசப் பேச்சாளர் திரு ப. திருநாவுக்கரசு.

ஓர் உதாரணம் அண்மையில் யீஷூனில் நடந்த கொலைச் சம்பவம்.

இரைச்சலால் அண்டை வீட்டாரிடையே பிரச்சினை தொடங்கியது.

பிரச்சினையைத் தீர்க்கச் சமரசப் பேச்சுக்கு அழைப்பு விடுக்கப்பட்டது என்றாலும் சந்தேக நபர் வர மறுத்துவிட்டதாக அதிகாரிகள் கூறினர்.

சமாதானப் பேச்சு என்றால் எப்படி இருக்கும் என்றே மக்கள் அறியாததால் அதில் ஈடுபடத் தயங்குவதாகத் திரு திருநாவுக்கரசு சொன்னார்.

"தாங்கள் விரும்பும் தீர்வு நிலையத்தில் கிடைக்காது என்று அவர்கள் நினைக்கிறார்கள். ஆனால், இங்கு வந்துவிட்டால் போதும். அவர்களிடம் பேசி, அவர்கள் விரும்பும் தீர்வுக்குத் இணக்கப் படிவத்தில் கையெழுத்திடுவார்கள்," என்றார் அவர்.