'கத்தார் உலகக் கிண்ணத்தைப் புறக்கணியுங்கள்!' -ஜெர்மனியில் காற்பந்து ரசிகர்கள் கோரிக்கை
(படம்: AP Photo/Michael Sohn)
இம்மாதம் கத்தாரில் நடைபெறவுள்ள உலகக் கிண்ணக் காற்பந்துப் போட்டியைப் புறக்கணிக்கும்படி ஜெர்மனி முழுவதும் விளையாட்டு அரங்கங்களில் ரசிகர்கள் கேட்டுக்கொண்டுள்ளனர்.
டார்ட்மண்ட் (Dortmund) நகரில் டார்ட்மண்ட் அணியின் ஆட்டத்தின்போது ரசிகர்கள் 'BOYCOTT QATAR 2022' அதாவது 'கத்தார் 2022 புறக்கணி' என்ற பதாகையைப் பிடித்துக்கொண்டு நின்றனர்.
விளையாடிய நிமிடங்களைக் காட்டிலும் மாண்டோர் எண்ணிக்கை அதிகம் என்று அவர்கள் இன்னொரு பதாகையில் குறிப்பிட்டனர்.
கத்தாரில் காற்பந்து விளையாடப்படக்கூடிய நேரமான 5,760 நிமிடங்களைக் காட்டிலும் அங்கு மாண்ட வெளிநாட்டு ஊழியர்களின் எண்ணிக்கையான 6,500 அதிகம் என்பதை அது குறிக்கின்றது.
ஆனால் 6,500 வெளிநாட்டு ஊழியர்கள் மாண்டதாக The Guardian செய்தி நிறுவனம் வெளியிட்ட தகவலைக் கத்தார் அதிகாரிகள் மறுத்துள்ளனர்.
Bayern Munich, Hertha Berlin ஆகிய குழுக்களின் ரசிகர்களும் இரு குழுக்களுக்கு இடையிலான ஆட்டத்தின்போது அத்தகைய பதாகைகளை ஏந்தி நின்றனர்.
'FIFA உலகக் கிண்ணம் கத்தார் 2022' - 64 ஆட்டங்களையும் meWATCH தளத்தில் நேரலையில் கண்டுரசிக்கலாம்.
சந்தா, விளையாட்டுகள் குறித்த மேல் விவரங்கள் - mewatch.sg/fifaworldcup
